Naghatag sang simpatiya si Iloilo City Councilor Romel Duron kay former Iloilo City Mayor Jed Patrick Mabilog kasunod sang nangin Quad Committee Hearing sa Kamara kaangot sa pagklaro sini sang iya pangalan.
Sa interview sang Bombo Radyo kay Councilor Duron, iya ginpahayag nga nangin kahigayonan sa anay alkalde ang hearing agud nga ma-eksplekar ang iya kaugalingon sa pag-tag sa iya sang administrasyon ni Former President Rodrigo Duterte nga protektor sang iligal nga druga sa Iloilo City.
Suno kay Duron, tuman ang pag-antos nga naagyan sang anay alkalde sa sulod sang halos pito ka tuig, kon sa diin, naapektohan gid ang iya emosyonal kag pinansyal nga aspeto sang kabuhi.
Nagapati man ang natungdan nga makabulig kay Mabilog ang pagpauli niya diri sa pungsod, kon sa diin, mahimo na ini makaumpisa sang bag-o nga pagpangabuhi.
Gintumod man ni Duron nga madamo sang kadungganan ang gindala ni Mabilog sa syudad sang ini ang nagaserbi pa bilang alkalde.
