ILOILO CITY – Ginkwestiyon ni Iloilo City Councilor Ely Estante kun ngaa nga nahatagan sang permit ang J&T Express sa Mc Arthur Drive, Barangay Quintin Salas, Jaro apisar nga wala sang closed circuit television.
Ang nasambit nga courier company ang ginhold-up sang damlag lang kag natukiban nga wala sang may gin-install nga closed circuit television sa ila building.
Sa interview sang Bombo Radyo kay Estante, iya ginpahayag nga ang pagbutang sang closed circuit television ang isa sa mga requirements sa pag-secure sang permit.
Suno sa opisyal, may salabton ang management kag dapat nga magpaathag sa otoridad kun ngaa nga wala sila naka-install sang camera.
Kaangot diri, ginpahayag ni Estante nga ti-on na agud nga amyendaran ang Regulation Ordinance 2011-307 ukon ang Closed Circuit Television ordinance sang syudad.
Sang nagligad nga semana, ginduso ni Councilor Miguel Treñas ang pag-amyendar sini kag nagalaum si Estante nga maklaruhan na ini.
Sa obserbasyon ni Estante, ang mga establishments ang nagatakud lamang sang camera para sa compliance apang wala gina-monitor rason nga indi man makita kun may yara sang makaduluda na nga nagakatabo.
Pahayag sang natungdan, ang Closed Circuit Television ordinance ang may katuyu-an nga mahatagan sang proteksiyon ang mga establishments kag ang mga nagasulod nga kliyente.
Si Estante ang isa sa mga konsehal sang syudad nga nagduso nga amyendaran ang nasambit nga ordinansa.
