Ginpanindugan ni Iloilo City Councilor Ely Estante nga madamo siya sang binuligan sa syudad sang Iloilo sa tunga sang COVID-19 pandemic.
Sa interview sang Bombo Radyo kay Councilor Ely Estante nga amo man ang Chairman sang Engineering, Construction, kag Public Works sa konseho, iya ginpahayag nga sang nag-umpisa ang COVID-19 pandemic, ginduso niya ang facemask kag faceshield ordinance.
Suno kay Estante, indi man literal nga makita sang mga pumuluyo sang syudad ang iya trabaho sa konseho, apang ginpat-od niya nga mabatyagan naman sang mga ini ang iya pagpaninguha pinaagi sa COVID-19 Vaccination kag ayuda nga mga pagkaon nga ginapanagtag sa mga apektado sang pandemya.
Ginpahayag niya nga ini bangud ang tanan nga proyekto sang syudad ang nagaagi sa ila sa konseho sa diin sila ang nagapirma sang mga proyekto nga ginapatuman sang Iloilo City Government.
”In terms sang aton pagpaninguha, indi gid man makita ang aton nga bulig sa mga pumuluyo sang syudad. Pero mabatyagan nila ini sa pagbakal sang syudad sang bakuna, sa mga pagkaon nga ayuda kag TUPAD projects. Halin ina sa approval sang City Council nga ginahingyo ni Mayor.”
