ILOILO CITY – ‘Lain ang kahulugan sang ginpahulam sa ginhatag’.
Ini ang ang sabat ni Iloilo City Councilor Ely Estante sa tunga sang kontrobersiya kasunod sang pick-up trucks nga gintanyag ni Mayor Jerry Treñas sa kada konsehal sa syudad sang Iloilo subong nga may COVID-19 pandemic.
Sa interview sang Bombo Radyo kay Estante, iya ginpahayag nga ‘wala ginhatag’ ang 4×2 Mitsubishi Strada nga salakyan kundi ‘ginpahulam’; buot silingon, kun matapos na ang ila tagsa ka termino, ibalik man ini sa Iloilo City Government.
Gin-athag man ni Estante nga ginbaton niya ang salakyan kag nagamit na sang nagligad nga sesyon bangud kinahanglan ang mobility para sa iya ginauyatan nga mga trabaho.
Una suno kay Estante, pinuno siya sang Iloilo City Project Monitoring Council kun sa diin lakip sa trabaho amo ang pag-inspect sa mga proyekto sa syudad sa tanan nga distrito sang syudad.
Suno sa konsehal, madugay naman siya nga naghingyo sa alkalde nga kuntani may i-provide nga salakyan agud nga maplastar ang ila trabaho sang madasig kag matawhay.
Sa palamangkutanon naman kun ngaa subong nga tion sang pandemya nag-abot ang mga salakyan, ginpahayag ni Estante nga sa pagpungko palang ni Mayor Treñas bilang alkalde, napasalig na niya ini nga mga salakyan sa konsehal, kag ‘wala man sila namalibad bangud wala gani sila nangayo’.
Ginrason man ni Estante nga ang iban gani nga highly-urbanized cities ang may mga ginaprocure man nga mga salakyan para sa ila nga mga department heads, police stations, kag iban pa nga opisyal para sa ila opisyal nga function.
