𝗜𝗟𝗢𝗜𝗟𝗢 𝗖𝗜𝗧𝗬 — Nagpanindugan si Iloilo City Councilor Ely Estante, Jr. nga ang iya pamangkot tuhoy sa kun sin-o ang tag-iya sang balay nga ginrentahan sang 17 ka mga Undocumented Chinese Nationals ang isa lamang ka ‘fact’ ukon kamatuoran.
Ini kasunod man sang ginpatigayon nga committee hearing kahapon nga adlaw sang Iloilo City Council.
Sa interview sang Bombo Radyo Iloilo kay Councilor Estante, iya ginpahayag ang iya nga ginpamangkot ang indi makaimpluwensya sa dalagan kag hurisdiksyon sang kaso kag wala naglapas sa sub judice rule.
Suno kay Estante, ang investigation in aid of legislation amo ang matumod ang mga ‘illegal aliens’ sa Iloilo City bangud ang iban ang nagarenta sa subdivision ukon nagabakal sang balay.
Gin-athag man sini nga ang pamangkot niya ang may katuyu-an lang kuntani nga maplastar kon paano nakasulod ang 17 ka mga Undocumented Chinese Nationals sa syudad sang tinalikdan nga tuig.
Apang, ang topiko ang gin-utod sa konseho rason nga ginpabay-an na lamang sini kag nagpadayon nga nagpamati sa dalagan sang hearing.
Ginpahayag man sini nga dapat hatagan sang kahigayunan kag tyempo ang naga-imbestigar bangud indi makaigo ang duha ka questions sa tatlo ka minutos.
Ginlaragway man sini nga mahina ang nangin akto sang Bureau of Immigration bangud nagakinahanglan pa sila sang pormal nga complaint antes nga maghulag agud solusyunan ang iligal nga pagsulod sang Chinese Nationals sa syudad.
Nahibaluan nga ang sub judice rule ang isa ka palaagyan agud nga indi maimpluwensyahan sang public opinion ang mangin desisyon sang isa ka hurado sa isa ka nagadalagan nga kaso.
