ILOILO CITY – Nagapanindugan si Iloilo City Councilor Rudolph Jeffrey Ganzon nga ‘in good faith’ ang iya pagbaton sang kontrobersyal nga 4×2 Mitsubishi Strada pick-up truck nga gintugyan ni Iloilo City Mayor Jerry Treñas.
Sa interview sang Bombo Radyo kay Ganzon, iya ginpahayag nga labi ini nga kinahanglan sa iya nga trabaho bilang pinuno sang Commitee on Tourism, Culture, and Historical Affairs kag Committee on Trade and Commerce Industry kag bilang vice chairman sang Commitee on Health kag Committee on Peace and Order and Public Safety.
Suno kay Ganzon, ginarespeto niya kun may mga konsehal nga wala nagbaton sang salakyan bangud basi kun masarangan man nila ang ila trabaho kag kun may salakyan man sila nga ginagamit.
Delayed na gani suno sa iya ang pag-abot sang pick-up trucks bangud 2019 pa lang, ginaistoryahan na ini sa konseho apang naulihi lang bangud sa COVID-19 pandemic.
Gin-athag man ni Ganzon nga banggud ‘ginpahulam lang ini kag wala ginhatag’, handa man siya nga ipahulam ini sa iban nga ahensya para sa official government function.
