Nagapati ang chairman sang Committee on Domestic and International Relations sang Iloilo City Council nga madamo sang kaayuhan nga dala ang sisterhood agreements sa tunga sang China kag Pilipinas partikular ang Iloilo City.
May kaangtanan ini sa pag-file sang mga mamalidha nga myembro sang Akbayan party list, Mamamayang Liberal (ML), kag Liberal Party (LP) sang resolusyon nga imbestigaran ang mga sister city agreements sa tunga sang Pilipinas kag China kag ginaduso nga bawion ini bangud sa pagpati nga gamiton lang ini sang Chinese government para sa ila interes.
Base sa data, may 16 nga sister city partnerships sa DILG samtang 29 naman ang sa idalom sang League of Cities of the Philippines sa tunga sang mga local government units sa Pilipinas kag mga syudad sa China.
Sa bahin sang Iloilo City, naka-establish ini sang sister city ties sa Qingdao sang 2000, Guangzhou City sa Fujian province sang 2020, kag Wuhan sa Hubei province sang 2021.
Sa interview sang Bombo Radyo kay Councilor Rudolph Ganzon, iya ginpahayag nga ini nga mga sisterhood agreements ang makabulig sa pag-boost sang ekonomiya, promosyon sang turismo, kag pag-engganyo sang dugang nga mga investors.
Apang, gin-athag naman sang opisyal nga pabor man ini nga i-review ang mga agreements ilabi na kun wala man gid sang regular nga mga aktibidad sa tunga mga siyudad.
Suno sa iya, kumporme man ini sa pag-review agud masiguro nga ang kaundan sang agreements ang wala sang peligro nga dala sa safety sang syudad kag sang pungsod.
Dugang niya, mas maayo man nga indi lang ang sisterhood agreements sa China ang i-review kundi pati man sa iban nga syudad sa Pilipinas kag sa luwas sang pungsod.
