I-attempt liwat ni Councilor Sheen Marie Mabilog nga mag-deliver sang privilege speech sa regular session sang Iloilo City Council sa masunod nga semana.
Ini matapos nga wala ini gintugutan sang mayorya sang konseho nga maghatag sang iya speech sang nagligad nga Mierkules, Agusto 13.
Sa interview sang Bombo Radyo kay Mabilog, iya ginpahayag nga wala sang limitasyon ang isa ka konsehal may kaangtanan sa paghatag sang privilege speech angot sa isyu sa Real Property Tax.
Suno kay Mabilog, indi siya mag-untat sa iya kawsa bangud kawsa man ini sang mga pumuluyo nga nagaantos sang epekto sang tuman ka mahal nga buwis sa syudad.
Nahibaluan nga ini na ang ikatatlo nga tion nga napaslawan si Mabilog nga makuha ang suporta sang iya kaupdanan sa konseho.
Sang Hulyo 16, nag-propose ini sang ordinansa nga nagaduso sang 80% reduction sa real property tax (RPT) apang wala ini ginsuportahan sang iban nga konsehal.
Sang Hulyo 31, wala man sang bisan isa ka konsehal nga nagsegunda sa gin-file niya liwat nga ordinansa.
Gin-akusahan naman ni Mabilog nga bulag kag bungol sa pagbakho sang mga taxpayers ang iya kaupdanan nga konsehal sa diin 11 gid sa ila ang kaalyado ni Mayor Raisa Treñas.
