𝗜𝗟𝗢𝗜𝗟𝗢 𝗖𝗜𝗧𝗬 —Nagprangka si Iloilo City Councilor Miguel Treñas nga indi ini makahatag sang suporta kay former Iloilo City Mayor Joe Espinosa III pananglitan nga magpadalagan ini sa palaabuton nga 2025 elections.
Sa interview sang Bombo Radyo kay Councilor Treñas, iya ginpahayag nga naistoryahan nila ni Espinosa ang politika sa syudad kon sa diin, naghingyo man ini nga suportahan ang kandidatura sang iya utod nga si Raisa Treñas-Chu sa pagka-kongresista sang Iloilo City.
Suno kay Treñas, sa subong, wala pa nakahambal si Espinosa kon magapadalagan ini gidman sa isa ka posisyon sa syudad sa maabot nga eleksyon.
Ginpahayag man sini nga kon magapadalagan gidman si Espinosa kontra sa ila line-up, nag-ako ini nga indi niya mahatagan sang suporta bangud hitso na ang ila nga linyada.
Ginpasigurado man sang natungdan nga bilog ang suporta ni Espinosa sa ila apisar sang nanari-sari nga spekulasyon sa politika nahananungod sa anay leder sang syudad.
Gin-athag man ni Councilor Treñas nga indi matuod nga nag-ayohay lang sila sang anay alkalde para sa eleksyon, bangud sadto pa lang, nagaistoryahanay na si Raisa Treñas-Chu kay Espinosa apisar nga wala pa ang eleksyon.
