ILOILO CITY – Ginkwestiyon ni Iloilo City Councilor Plaridel Nava ang common sense sang kaangay sini nga konsehal nga si Atty. Rex Marcus Sarabia, bilang isa ka abogado.
Sa interview sang Bombo Radyo kay Nava, iya ginpahayag nga bilang isa ka abogado, dapat nga nahibaluan niya nga sa sosyodad, imposible na nga mag-reconcile pa ang asawa kag ang ikaduha nga asawa.
Ini ang may kaangtanan sa rekomendasyon sang komitiba ni Councilor Sarabia nga dapat mag-inhibit ang city council sa pag-desisyon sa reklamo sang iloy ni Councilor Nava nga si Lustresa Nava batok kay Punong Barangay Marites Nava, nga ikaduha nga asawa sang amay sang konsehal.
Suno pa kay Nava, nagalaum siya kuntani nga mahatagan sang hustisya sang Iloilo City Council ang kaso sang iya iloy.
Apang daw kaangay nga nakulbaan pa ang konseho suno kay Nava.
Sa nangin aktwasyon naman ni Sarabia sa session sang konseho, ginpahayag ni Nava nga na-settle na ang una nga tensyon sa tunga nila apang nasulit pa sa gihapon.
Pahayag ni Nava, sa iya nahibalu-an, ‘yamuhat’ nga tawo si Sarabia kag masami nga nagayuhom apisar naga-isahanon.
Sa ginpatigayon nga deliberasyon sa Committee Report ni Councilor Sarabia, naobserbahan ni Councilor Nava nga nagakadlaw ang bataon nga konsehal samtang nagahambal naman ang opposition councilor.
Hugot naman nga ginpanginwala ni Sarabia ang alegasyon ni Nava kag nagsiling nga nagkagat lamang ini sang dila bilang stress response.
Samtang, nagaplano man ang pamilya Nava nga magdangup sa Commission on Elections agud nga dumili-an si Punong Barangay Marites Nava nga maggamit sang apelyido nila.
