ILOILO CITY – Liwat naman nga nag-init ang session sa Iloilo City Council matapos nga nagsabtanay sanday Iloilo City Councilors Plaridel Nava kag Atty. Sedfrey Cabaluna.
Ini matapos nga naakig si Nava kay Cabaluna matapos nga gintawag niya ini nga “Manong Nava” kag ginsaruso ni Nava ang bataon nga konsehal.
Sa interview sang Bombo Radyo kay Councilor Nava, iya ginpahayag nga wala na ini nakapugong kag ginpalapitan niya si Cabaluna bangud nainsulto ini sa gintawag sa iya.
Suno kay Nava, indi na kinahanglan pa nga magbilin sang side comment, sa baylo kinahanglan nga hatagan sang igtalupangod ang ginaduso nga ordinansa.
Diri kag nagpalapit na ang gwardya sang Iloilo City Council agud punggan si Nava.
Nagpatunga naman si Councilor Rudolph Ganzon nga nagaserbe bilang presiding officer.
Nagbulig man pugong si Councilor Romel Duron samtang ang iban nga konsehal ang nagatulok lang.
Pahayag ni Nava, indi insakto ang nangin paminatasan sang konsehal, gani nagakadapat nga sawayon ini.
Sa interview naman sang Bombo Radyo kay Cabaluna, iya ginpahayag nga nagapakita lamang ini sang iya pag-respetar sa kaangay nga konsehal kag wala ini sang intensyon nga mang-insulto, sa baylo nagapasalamat ini sa ginadikta sang konsehal.
Suno kay Cabaluna, trabaho lamang ang tanan kag wala niya ini ginalakipan sang personal nga isyu.
Matapos ang session, ginpalapitan ni Cabaluna si Nava kag ginkumusta.
Matandaan nga sang nagligad nga semana, diyutayan man nga sumbagon ni Nava si Iloilo City Councilor Rex Sarabia bangud nga wala nauyunan ni Nava ang suno sa iya pagkutaw-kutaw ni Sarabia nga nagakaon sang popcorn, apang sang ulihi na-settle man ang tensyon.
Nagapati ang alyansa sang mga manunudlo sa pungsod nga sa tion nga indi mabalik sa daan nga sistema ang school calendar, kada tuig na nga magaantos ang sektor sang edukasyon.
Sa interview sang Bombo Radyo kay Mr. Vladimer Quetua, Chairman sang Alliance of Concerned Teachers, iya ginpahayag nga kun indi pagtinguhaan nga mabalik sa Abril kag Mayo ang summer break, kada tuig man nga magapatuman sang hybrid learning modalities sa kada summer.
Suno kay Quetua, sa subong, maathag ang mga disbentaha sang bag-o nga school calendar bangud halos adlaw-adlaw, may yara sang mga estudyante kag manunudlo nga ginadala sa clinics bangud sa paglingin sang ulo, pagtaas sang blood pressure, nosebleeding kag iban pa nga heat-induced health problems.
Pahayag sang natungdan, isa man sa nagapalala sang problema amo ang kakulang sang classrooms kag manunudlo rason nga nagaginutok ang mga estudyante gani problemado man ang ventilation system.
Una na nga ginlaslasan ni Quetua si Presidente Ferdinand Marcos Jr sa pahayag sini nga ang pag-revert sang school break sa summer months ang indi mahapos bangud sa nagataas liwat nga kaso sang COVID-19 cases, kag suno kay Quetua, wala sang koneksyon ang kaso sang balatian sa pagbalik sang school calendar sa pre-pandemic schedule.
