ILOILO CITY – Nagapati si Iloilo City Councilor Plaridel Nava nga ma-resolve ang issue sang Ungka flyover sa tion nga wala sang may mag-impluwensya sa ginpasaka nga kaso sa Office of the Ombudsman batuk sa apat ka mga opisyal sang Department of Public Works and Highways, duha ka corporate officers sang International Builders Corporation kag mga John Does.
Kahapon sang hapon, pormal na nga ginpasakaan sang kaso sanday anay Department of Public Works and Highways Region VI Director Tiburcio Canlas; Department of Public Works and Highways Region VI Regional Director Nerie Bueno; Asst. Regional Director Jose Al Fruto kag Project Engineer Ormel Santos.
Kabahin sa mga ginpasakaan sang kaso ang mga personalidad sa bahin sang International Builders Corporation nga sanday Helen Edith Lee Tan kag Allen Son Tan, kag mga John Does nga may kahilabtanan sa pagkomiter sang violation nga sa subong, indi pa mapat-ud ang mga pangalan.
Magapangatubang sang mga kaso nga Gross Neglect of Duty, Grave Misconduct kag Conduct Prejudicial to the Best Interest of Public Service ang mga pangalan nga yara sa affidavit of complaint.
Sa interview sang Bombo Radyo kay Nava, iya ginpahayag nga maayo nga argumento ang ila nga ginpresentar sa pagpasaka sang kaso gani, nagapati ini nga maresolbar sang Office of the Ombudsman ang problema kag indi lamang mag-untat sa imbestigasyon.
Nagpasalig man ang opisina nga tun-an nila ang mga ebidensya nga ginhatag sang mga tagreklamo kag sa kun kulang, sila na mismo ang magapangayo sa Department of Public Works and Highways.
Dugang pa niya, mahimo man nga magpatigayon sang motu propio investigation ang ahensya apang mas maayo gid kun may yara sang complaint affidavits.
Nagpasalamat man ini sa mga pro bono lawyers nga nagbulig sa iya sa paghanda sa pagpasaka sang kaso.
Pahayag pa ni Nava, nagalaum ini nga suportahan man sang publiko ang ila nga tikang mangin sa pagpangamuyo lamang agud nga mahatag ang hustisya.
