Gin-athag ni Iloilo City Councilor Romel Duron nga palangga sini ang mga myembro sang LGBTQ+ Community bangud man nga may mga abyan man siya nga myembro sang komunidad.
Ini kasunod man sang pagkondenar sa iya sang Office of the LGBTQ Affairs matapos man nga gingamit sini ang terminolohiya nga “inagi” sa ila indi pag-intindihanay ni Councilor Sedfrey Cabaluna.
Sa interview sang Bombo Radyo kay Councilor Duron, iya ginpahayag nga suportado kag ginarespeto niya ang mga panindugan sang nasambit nga komunidad.
Suno kay Duron, wala siya sang tuyo nga ipakalain ang kabahin sang LGBTQ kag ang iya pagsambit sang tinaga nga “inagi” ang sabat lamang kay Cabaluna bangud indi relevant ang nangin sabat sa iya pamangkot.
Ginpahayag man sini nga isa lamang sila ka grupo ni Cabaluna kag kaupod man sila kon may mga importante nga kaladtoan.
Apang, gin-ako man sang natungdan nga may mga tion nga na-offend siya kay Cabaluna bangud man sa kada pamangkot niya, ginabalik man sa iya palamangkotanon.
