ILOILO CITY – Ginapanindugan ni Iloilo City Councilor Rudolph Ganzon nga usik sa tyempo, kwarta kag pinta ang ginapatigayon nga pagpaminta sang mga pedestrian lanes sa Iloilo City sang District Engineering Office.
Ini matapos naobserbahan sang konsehal nga ang ginapahamtang nga pedestrian lanes ang masami nga naga-doble lang kag wala nabutang sa mga strategic areas.
Sa interview sang Bombo Radyo kay Councilor Ganzon, iya ginpahayag nga nagakadapat nga i-redefine ang mga pagsulundan kun sa diin ang mga dalan nga nalakip sa national road lamang ang kinahanglan nga pintahan sang pedestrian lanes.
Suno sa konsehal, magatawag ini sa District Engineering Office agud istoryahon kun ano ang basehan sa pagpabutang sang pedestrian lanes.
Ginpahayag dugang sang natungdan nga kinahanglan nga makig-angot si Councilor Johnny Young nga amo ang Chairman sang Committee on Engineering, Construction and Public Works kay Councilor Sedfrey Cabaluna nga Chairman sang Committee on Transportation agud ma-address ang public works kag traffic sa syudad.
