ILOILO CITY– Nagpasar sang resolusyon ang isa ka konsehal sang syudad sang Iloilo para sa mga yara sa sektor sang transportasyon nga kun may yara sang mga pasahero nga may sintomas sang coronavirus disease 2019, gilayun nga ireport.
Sa interview sang Bombo Radyo kay Iloilo City Councilor Romel Duron, iya ginpahayag nga sa nasambit nga resolusyon, ginapangabay ang mga drivers nga kun may pasahero nga may sintomas, indi na pagpatugayon kag ireport, idal-on sa pinakamalapit nga hospital ukon mga health centers.
Suno kay Duron, kinahanglan man nga obserbaran sang mga drivers ang social distancing kag indi mahimo nga pun-on sang capacity sang pasahero ang jeep.
Pahayag pa ni Duron, sa tion sang emerhensya, may yara sang mga jeep nga magabyahe agud mahatagan sang ligwa ang emerhensya.
Nagahingyo man si Duron sang bayanihan sa kadam-an sa subong nga kinahanglanon ang pagbinulugay sang tanan sa tion sang krisis.
