Dapat na nga amyendahan ang Electric Power Industry Reform Act of 2001 ukon ang EPIRA Law agud mahatagan sang mas epektibo nga sabat ang nagapadayon nga power crisis sa Visayas.
Ini ang panawagan ni Iloilo City Councilor Rex Marcus Sarabia kasunod sang liwat-liwat nga Red kag Yellow Alerts nga nagtuga sang rotational brownouts sa syudad.
Suno kay Sarabia, kinahanglan repasuhon ang EPIRA Law, ilabi na ang probisyon nga nagpatuman sang competitive kag open market sa power generation.
Pahayag niya, base sa datos sang NGCP sang Setyembre 15, may yara sang 33 ka power plants nga offline ukon nagadalagan sa derated capacity, nga nagresulta sa 962.9 megawatts nga kakulang sa suplay.
Bangud sini, suno kay Sarabai, kinahanglan na nga magpahilabot ang gobyerno kag palig-unon ang iya papel sa pagsiguro sang nagakaigo kag masaligan nga suplay sang kuryente.
Ginpahayag man niya nga wala sang bag-o nga power plant nga natukod sa Iloilo halin pa sang tuig 2016, nga iya gin-angot sa limitasyon sang sistema sa power generation.
Dugang pa niya, ang pag-amyendar sang EPIRA law ang kinahanglan diskusyonan agud mas maprotektahan ang interes sang mga konsumidor kag malikawan ang mas malala nga power crisis.
