Gin-athag sang chairman sang Committee on Blue Ribbon sa Iloilo City Council nga wala ini sang nabaton nga mando nga aregluhon na lang ang mga kaso sang barangay officials nga ginakaptan sini.
Sa interview sang Bombo Radyo kay Councilor Rex Sarabia, iya ginpahayag nga wala ginalaktan sang politika ang mga kaso.
Suno sa iya, kun may merit ang kaso, padayunon ini kag kun wala man sang bug-at ang kaso, mahimo man ini nga i-dismiss.
Pahayag niya, ginatungdan lang niya ang iya responsibilidad agud nga mapaluntad ang hustisya kag masilutan kun sin-o man ang may sala ukon kapaltahan bilang mga opisyal sang barangay.
Nahibaluan nga ang pinakaulihi nga kaso nga involved ang barangay official amo ang kay San Isidro, Jaro Punong Barangay Ronel Juaneza nga gindagdagan sang 60 ka adlaw nga suspension order bangud sa reklamo nga gin-file sang mga barangay kagawad sa gin-alegar iregularidad sa gin-release nga P818,000 nga pondo sang barangay sa pagbakal sang well-milled rice, bulong sa mga senior citizens kag office supplies sang Disyembre 2023 tubtob Enero 2024.
Hugot naman nga nanindugan si Juaneza nga indi ini guilty kag ginpulitika lamang siya bangud nga hayag nga supporter ini sang kampo ni Rep. Julienne Baronda.
