Ginklaro ni Iloilo City Councilor Sheen Marie Mabilog nga wala sini ginakabig nga dako ang isyu ang pagbawi sang tinapay nga ginhatag sa iya sang isa ka lalaki nga personnel sang Sangguniang Panglungsod (SP) kadungan sang session nga ginhiwat sang Nobyembre 4.
Nakuhaan sang video ang amo nga hitabo nga nag-ani naman sang nagkalain-lain nga reaksyon.
Sa interview sang Bombo Radyo kay Mabilog, iya ginpahayag nga wala man sini gin-ekspektar nga may mabaton siya nga pamahaw bangud sang nagligad nga mga session, wala man siya ginahatagan.
Suno sa iya, humalin sadto pa man, sila ni Iloilo City Vice Mayor Lady Julie Grace ‘Love-Love’ Baronda ang wala ginahatagan sang pamahaw gani nakibot man siya nga ginbutangan siya sang tinapay sa table nga sang ulihi ginbawi man.
Gin-athag man ni Mabilog nga wala sila sang official assignment kung sin-o ang magahatag sang pamahaw kada session, kag wala man siya sang ideya kung sin-o ang nagapadumala sini tungod nagafocus lamang siya sa pagpamati sa session.
Sa pagpangusisa man sang Bombo Radyo, ginapahayag nga si Liga ng mga Barangay President Irene Ong ang na-assign nga mag-provide sang pamahaw para sa amo nga sesyon.
Nanindugan si Mabilog nga indi ini big deal para sa iya kag pabor sa iya ang pagbawi sang pamahaw banngud naga-diet siya kag nagapaniwang.
Ginpakamaayo naman ni Mabilog nga istoryahan na lang nila sa konseho ang amo nga insidente.
Kasunod sang insidente, nag-post man sa iya facebook page si Vice Mayor Love Baronda nga nagasiling wala sang allocated budget sa idalom sang OVM para sa pag-provide sang pamahaw sa tion sang sessions bangud suno sa iya, wala man sang budget.
“Hello! Just to set the record straight, there is no allocated budget under the OVM for meals during sessions. Wala budget nganiii,” suno kay VM Baronda kasunod sang komento sang pila ka netizens nga ang opisina sang Vice Mayor ang dapat nga maghatag sang pamahaw kun may session.
