𝗜𝗟𝗢𝗜𝗟𝗢 𝗖𝗜𝗧𝗬— Indi kumpurme si Iloilo City Councilor Urminico Baronda sa rason sang Iloilo City Government kaangot sa pagpasar sang duha ka mga resolusyon batok sa Department of Public Works and Highways (DPWH) kag Iloilo City District Engineering Office.
Ini kasunod man sa pagdeklara kay Engr. Roy Pacanan nga Persona Non Grata sa Iloilo City.
Sa interview sang Bombo Radyo kay Baronda, iya ginpahayag kuntani ginpakadto anay sa city hall si Pacanan agud istoryahon hatagan sang oras agud mag-eksplekar sang iya nga kaugalingon antes paman nga gindeklara nga Persona Non Grata.
Suno kay Baronda, kuntani ginpakadto-an ang mga proyekto sang DPWH Region VI sa syudad agud matumod kun delay gidman antes paman gin-revoke ang ila otoridad sa pito ka mga proyekto.
Ginkwestyon naman sang natungdan kun ngaa ang mga tawo ang ginatira sang city government kag indi ang talatapan mismo.
Wala naman naghatag sang komento si Councilor Baronda kun may kaangot sa pulitika ang mga nagakalatabo sa Iloilo City Government.
Nahibaluan nga lakip sa mga gin-revoke sang Iloilo City Council nga proyekto sang DPWH Region VI amo ang:
- Mandurriao Market
- Dulonan, Arevalo Multi-Purpose Building
- Dungon C, Mandurriao Multi-Purpose Building
- Tanza Esperanza Multi-Purpose Building
- Santa Filomena, Arevalo Multi-Purpose Building
- Balantang, Jaro Multi-Purpose Building
- Katilingban, Molo Multi-Purpose Building
