Ginkwestyon sang chairman sang Committee on Engineering ang malaka-laka nga pag-ubra sang Iloilo City District Engineering Office sa drainage system sa JM Basa Street, Iloilo City Proper.
Sa interview sang Bombo Radyo Councilor Johnny Young, iya ginpahayag nga siya mismo ang nakabaton sang reklamo nga wala sang halos sang may makita nga mga trabahador nga nagaubra sa drainage system.
Suno kay Young, sa iya paglantaw, posible nga kulang ang mga trabahador gani indi tayuyon ang pagkay-o sang drainage system.
Pahayag sang konsehal, ipatawag niya ang Iloilo City District Engineering Office agud pangayuan sang paathag tuhoy sa proyekto.
Nahibaluan nga base sa permit, September 2024 tubtob July 2025 lang ang ginhatag nga period para sa pagkay-o sa amo nga area.
Nagalaum man si Young nga mapangitaan sang paagi nga mabutangan sang steel plate ang ginakay-o nga porsyon bangud importante nga ruta ini sang mga tribu nga magapasakop sa Dinagyang Festival 2025 kag agud indi man mabudlayan ang mga tawo nga magalagaw sa syudad.
