ILOILO CITY – Nabulgar sa Iloilo City Council nga nakaandan na sang Department of Public Works and Highways (DPWH) nga magpatukod sang proyekto apisar nga wala pa sang business permit.
Sa interview sang Bombo Radyo kay Councilor Johny Young, Chairman sang Committee on Engineering, Construction and Public Works sa konseho, iya ginpahayag nga natukiban nila nga madamo sang mga proyekto sa Iloilo City ang wala sang building permit apisar, apang nakapatukod na sang proyekto.
Lakip na diri ang Multi-purpose building sa Desamparados, Jaro, Iloilo City kag sa subong naman ang Multi-purpose builing sa San Isidro, La Paz, Iloilo City.
Suno kay Young, luyag na sini nga mauntat ang sala nga proseso sa pagpatukod sang proyekto sang gobyerno nga nakaandan na sang pila ka dekada.
Ginpahayag sang konsehal nga kinahanglan anay nga may yara sang business permit antes ang pagpatukod sang proyekto agud mausisa sang Office of the Building Official kun may yara ukon wala ini sang mga nalapas nga mga pagsulundan.
