Ginakalipay ni Iloilo City Councilor Alan Zaldivar ang pagpauli ni Former Iloilo City Mayor Jed Patrick Mabilog sa syudad.
Ini kasunod man sa pagtinir sang anay alkalde sa Estados Unidos sang pito ka tuig bangud sa pag-tag sang anay administrasyon ni Former President Rodrigo Duterte nga protektor ini sang iligal nga druga.
Sa interview sang Bombo Radyo kay Councilor Alan Zaldivar, iya ginpahayag nga personal siya nga nalipay bangud mahatagan na sang kahigayonan ang anay alkalde nga maklaro ang iya pangalan.
Suno kay Zaldivar, nangin madugay man sila nga magkaupod ni Mabilog sa pagserbisyo sa syudad.
Ginpahayag man sini ang iya ‘regards’ kag sang iya pamilya para sa anay alkalde.
Nahibaluan nga anay nangin Public Employment Service Office (PESO) manager si Zaldivar sa idalom sang pagpamuno ni former Mayor Mabilog.
Nagapati naman ang natungdan nga apisar nga indi pa siya pag-endorso sang anay alkalde sa facebook, bal-an sini nga nadala siya sa mga pagpangamuyo ni Mabilog.
