Nagpaathag si Iloilo City Councilor Alan Zaldivar kun ngaa wala nadayon subong nga adlaw ang paghatag niya sang privilege speech sa konseho may kaangtanan sa pagpamuyayaw ni JK Labajo sa iya nga concert sa tion sang Dinagyang Festival 2025.
Sa interview sang Bombo Radyo kay Councilor Zaldivar, iya ginpahayag nga naglapaw na ang ti-on nga dapat mapasa ang intension nga maghatag sang privilege speech.
Suno sa natungdan, indi niya luyag maglapas sa ila nga internal rules ilabi na sa pagpasa sang inogpa-agenda.
Ginkalipay man niya ang nangin sabat sang Iloilo Festivals Foundation Incorporated (IFFI) nga istoryahan ang pagplastar sang ano man nga pagsulundan agud indi na maliwat ang kapareho nga hitabo.
Gin-ako man ni Zaldivar nga fan siya ni Labajo sugod sang nakita sini sa isa ka singing competition ang singer.
