𝗠𝗔𝗡𝗜𝗟𝗔 —Ginmando sang Court of Appeals (CA) ang pag-freeze sang mga bank accounts kag personal assets sang suspendido nga Tarlac Mayor Alice Guo kag duha ka iban pa.
Suno sa Anti-Money Laundering Council (AMLC), ang Court of Appeals ang nagpaguwa sang resolusyon, isa ka adlaw pagkatapos nga gin-file sang Anti-Money Laundering Council ang petisyon para sa freeze order.
Ginpahayag man sang Anti-Money Laundering Council nga sanday Guo, Zhiyang Huang, kag Baoying Lin ang ginasuspetsahan nga naga-operate sang human trafficking kag malimbungon nga mga hilikuton paagi sa mga entities pareho sang Zun Yuan Technology Inc., BAOFU Land Development Inc. kag Hongsheng Gaming Technology Inc.
Nagsiling man ang Anti-Money Laundering Council nga ang mando sa pag-freeze ang nagasakop sang 90 ka mga bank account sa 14 ka mga institusyon pinansyal, pila ka mga propedad sa real estate, kag mataas nga balor nga personal nga mga propedad pareho sang mga luho nga mga salakyan, kag isa ka helikopter.
Gin-athag man sang ahensya nga ang mando sa pag-freeze ang may tuyo nga magpugong sang pagkadula sang mga pagkabutang samtang ang imbestigasyon kag legal nga mga paghusay ang nagapadayon.
Ginhatagan man sang punto sang AMLC nga ang tatlo ka mga indibidwal nga sakop sang mandu ang may kaangtanan man sa ginadumilian nga aktibidad lakip na ang wala ginatugutan nga Philippine Offshore Gaming Operators (POGO) sa Zun Yuan Technology Inc.
Kun balikan, si Guo, nga sa karon suspendido sa iya posisyon, ang nangin subject sang imbestigasyon sang Senado bangud sa iya ginaalegar nga kaangtanan sa mga hilikuton sang Philippine Offshore Gaming Operators sa iya banwa nga Bamban.
Gin-raid man sang mga otoridad ang 10 ektarya nga POGO hub nga ginapadalagan sang Zun Yuan Technology Inc. sang Marso kag nakit-an ang pila ka mga device nga ginapahayag may kaangtanan sa operasyon sang POGO. Kapin sa 800 ka mga Pilipino kag mga dumuluong ang nasalbar sa nasambit nga raid.
Si Guo kag ang duha ka iban pa nga mga opisyales sang munisipyo ang ginsuspendir sang tubtob anum ka bulan sang Office of the Ombudsman matapos ginhatagan sang permit ang mga operators sang POGO company apisar kulang ang mga kinahanglanon nga dokumento kag provisional license gikan sa Philippine Amusement and Gaming Corporation.
Ginkwestyon man sang mga senador ang iya identity kasunod sang indi pag-alalangay sa iya mga sabat nahanungod sa iya nationality kag personal nga kabuhi.
Ginmandu sang panel sang Senado sang Miyerkules ang pagpaguwa sang arrest order batok kay Guo bangud sa kapaslawan nga magpakita sa tion sang imbestigasyon.
Apisar pa nga ginsambit ni Guo ang pagkakabalaka sa mental kag pisikal nga ikaayong lawas, gintudlo ni Senador Risa Hontiveros nga ang iya sulat, ang wala ginasuportahan sang isa ka sertipiko medikal.
