Nag-isyu ang Court of Appeals sang freeze order sa bank accounts kag mga propiedad sang Kingdom of Jesus Christ (KOJC) leader kag founder nga si Pastor Apollo Quiboloy kag iban pa.
Sa idalom sang 48 ka pahina nga resolution, lakip sa gin-freeze sang korte amo ang 10 ka bank accounts sang pastor, pito ka real properties, lima ka motor vehicles, kag isa ka aircraft.
Lakip man diri ang bank accounts mismo sang KOJC kag Swara Sug Media Corporation nga amo ang naga-operate sa Sonshine Media Network International (SMNI) nga amo ang media arm sang kingdom.
Pahayag sang korte, nakakita ini sang rasonable nga basehan nga patihan nga ang bank accounts sang pastor ang naangot sa iligal nga mga aktibidad kag mga krimen kaangay sang qualified human trafficking, sexual and child abuse, sex trafficking of children, fraud, conspiracy, marriage fraud, smuggling, money laundering, kag iban pa.
Gindugang sang appellate court nga mangin epektibo gilayon ang freeze order kag magalawig sa sulod sang 20 ka adlaw.
Nahibaluan nga wala gihapon nadakpan si Quibiloy tubtub subong apisar may gin-anunsyo na ang gobyerno nga P10-milyones nga padya sa sin-o man nga makahatag sang impormasyon kaangot sa iya lokasyon.
Nagapangatubang ini sang kaso sa Quezon City court sa idalom sang Section 5(b) sang Republic Act 7610 ukon ang Special Protection of Children Against Abuse, Exploitation, and Discrimination Act kag sa idalom sang Section 10(a) sang amo man nga layi.
Sa korte naman sa Pasig, may ginapangatubang ini nga non-bailable Qualified Human Trafficking charge sa idalom sang Section 4(a) sang Republic Act No. 9208.
Pareho man nga nag-isyu ang duha ka korte sang warrant of arrest batok sa nasambit nga self-proclaimed “Appointed Son of God.”
