ILOILO CITY – Nagsaka sa 48 ang positibo nga kaso sang Coronavirus Disease 2019 (COVID-19) sa Western Visayas.
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division kag tagpamaba sang Department of Health 6, iya ginpahayag nga tatlo ang nagdugang sa listahan sang mga nagpositibo sa COVID-19 sa rehiyon.
Suno kay Pulmones, ang Patient no. 46 amo ang 24 anyos nga lalaki sang Tigbauan, Iloilo, ang Patient no. 47 naman amo ang 26 anyos nga lalaki sang Tigbauan, Iloilo kag ang Patient no. 48 amo ang 77 anyos nga babayi sang Jaro, Iloilo City.
Ginpahayag ni Pulmones nga sa 55 ka laboratory result nga ginpaguwa sang Western Visayas Medical Center, kahapon, Abril 17, 3 ang nagpositibo samtang 52 naman ang nagnegatibo.
Ang releasing sang laboratory result suno sa natungdan ang nagalab-ot sa 48 tubtub 72 ka oras.
Ang numero sang mga naka recover ang nagapabilin sa walo samtang pito naman ang ginbawi-an sang kabuhi bangud sa nasambit nga virus.
