BUENAVISTA, GUIMARAS – May dugang nga lima ka mga COVID-19 cases nga na record sa Buenavista, Guimaras.
Ini ang ginpahayag sa Bombo Radyo ni Mayor Eugene Reyes apang suno sa iya, mahimo nga ini ang advance information.
Suno kay Reyes, tatlo sa lima ka mga pasyente amo ang mga Returning Overseas Filipinos nga nagapabilin sa hotel sa syudad sang Iloilo samtang ang duha naman ang ginalakipan sang isa ka iloy nga bag-o lang nagbata sa hospital sa syudad sang Iloilo kag 82 anyos nga may yara na sang comorbidity.
Apisar sini, ginpahayag ni Reyes nga wala pa sang may ginpatuman nga surgical ukon total lockdown sa banwa sang Buenavista.
Kadungan sini, ginpahayag sang alkalde nga maga-umpisa na buwas, Setyembre 23, ang pagbyahe sang fiberglass banca.
Ginpahayag ni Reyes nga ang byahe sang duha ka unit sang fiberglass banca ang maga-umpisa 5:00 sa kaagahon tubtub 8:30 sa gab-i kag bangud sa ginapatuman nga minimum health standards, 50% capacity lamang ang pahanugutan nga makasakay.
Paagi sini, ginpahayag sang alkalde nga mas madamo na nga pasahero ang maakomodar bangud nga ang byahe sang wooden-hull banca ang limitado lamang sa sunrise to sunset.
