ILOILO CITY – Dugang nga lima ka COVID-19 cases ang na record sa National Irrigation Administration Region 6.
Sa interview sang Bombo Radyo kay Steve Cordero, designated spokesperson sang National Irrigation Administration Region 6, iya ginpahayag nga nagapabilin nga asymptomatic ang lima ka pasyente.
Suno kay Cordero, ang apat ka pasyente ang nagapabilin sa quarantine facility sa syudad sang Iloilo samtang ang isa naman ang yara sa quarantine facility sa Calinog, Iloilo.
Ginpahayag ni Cordero nga ang pagkatukib sa dugang nga mga COVID-19 positive ang bunga sang inisyatibo sang ahensya nga pagpatigayon sang COVID-19 test.
Sa subong, ginpahayag sang natungdan nga sirado sa gihapon ang bug-os nga talatapan sang regional office tubtub nga indi pa matapos ang ginapatigayon nga disinfection.
Ang una nga duha ka COVID-19 positive nga empleyado sang ahensya ang nagapabilin man nga symptomatic.
Sa subong, pito na ang confirmed COVID-19 cases sa nasambit nga ahensya.
