ILOILO CITY – Nadugangan sang isa ang kumpirmado nga kaso sang Coronavirus Disease 2019 (COVID-19) sa Western Visayas kun sa diin nagsaka sa 108 ang kabug-usan nga numero.
Suno kay Dr. Reynilyn Reyes, COVID-19 spokesperson sang Department of Health 6, sa 448 ka laboratory results nga ginpaguwa sang Western Visayas Medical Center as of May 25, 445 ang nagnegatibo samtang tatlo naman ang nagpositibo.
Sa tatlo ka mga nagpositibo, isa diri ang panibag-o nga kaso samtang ang duha ang ginpaidalom sa repeat test.
Nagapabilin sa gihapon sa 74 ang naka recover kag 10 ang patay.
Ang isa ka panibag-o nga kaso amo ang Patient no. 108 – 41 anyos nga lalaki sang Bacolod City, isa ka Overseas Filipino Worker kag naka facility quarantine.
Sa subong, anum ang COVID-19 cases sa Aklan, 14 sa Antique, anum sa Capiz, 20 sa Iloilo, tatlo sa Negros Occidental, siyam sa Bacolod City, 18 sa Iloilo City kag 32 ang nagpositibo sa repatriates.
