ILOILO CITY – Apat ang nagdugang sa kumpirmado nga kaso sang Coronavirus Disease 2019 (COVID-19) sa Western Visayas kun sa diin naglab-ot na sa 97 ang kabug-usan nga numero.
Sa ginpaguwa nga case bulletin sang Department of Health 6, ang apat ka mga nagdugang sa COVID-19 cases ang lunsay repatriated Overseas Filipino Workers nga naka facility quarantine.
Ang Patient no. 94 amo ang 50 anyos nga lalaki sang Molo, Iloilo City, ang Patient no. 95 amo ang 30 anyos nga lalaki sang La Paz, Iloilo City, ang Patient no. 96 amo ang 23 anyos nga lalaki sang Iloilo City Proper kag ang Patient no. 97 amo ang 45 anyos nga lalaki sang Talisay City, Negros Occidental.
Suno kay Dr. Ma. Sophia Pulmones, pinuno sang Local Health Support Division kag COVID-19 spokesperson sang Department of Health 6, ang tatlo ka Overseas Filipino Workers nga taga syudad sang loilo ang nag-abot sang Abril 29 samtang ang isa naman nga residente sang Talisay City, Negros Occidental ang nag-abot sang Abril 28.
Ginpahayag ni Pulmones nga sa 83 ka specimen nga gin test sa Western Visayas Medical Center as of May 11, 76 ang nagnegatibo, apat ang panibag-o nga COVID-19 cases samtang 3 naman ang nagpositibo sa repeat testing.
Nagapabilin sa 38 ang naka recover samtang 10 naman ang patay bangud sa COVID-19 sa bug-os nga rehiyon.
Sa pangkabug-usan, anum ang COVID-19 cases sa Aklan, 14 sa Antique, lima sa Capiz, 18 sa Iloilo, 2 sa Negros Occidental, siyam sa Bacolod City, 15 sa Iloilo City kag 27 ang nagpositibo sa repatriates.
