ILOILO CITY – Nagapabilin sa gihapon sa 125 ang kumpirmado nga kaso sang Coronavirus Disease 2019 (COVID-19) sa Western Visayas.
As of June 8, lunsay negatibo ang 664 ka specimen nga ginpaidalom sa COVID-19 test kun sa diin 3 ang nagnegatibo sa repeat testing.
Magluwas nga wala sang panibag-o nga kaso, nagapabilin man sa 88 ang naka recover kag 11 ang patay.
Sa subong, 6 ang kaso sang COVID-19 sa Aklan, 14 sa Antique, 6 sa Capiz, 21 sa Iloilo Province, 3 sa Negros Occidental, 10 sa Bacolod City, 19 sa Iloilo City kag 46 sa repatriates.
May kaangtanan naman sa Patient No. 115 nga ginbawi-an sang kabuhi, ginpahayag ni Dr. Marie Jocelyn Te, Medical Coordinator sang Emerging and Re-emerging Infectious Diseases Region 6, myocardial infarction ukon heart attack ang ginkamatay sang biktima.
Magluwas sa myocardial infarction, may yara man sang Pneumonia ang biktima nga may yara sang travel history sa Spain.
Nahibalu-an nga nasapwan na lang nga wala na sang kabuhi sa sulod sang Comfort Room sang Western Visayas Sanitarium ang 39 anyos nga lalaki nga isa ka Overseas Filipino Worker sang Anilao, Iloilo.
