ILOILO CITY – Wala sang panibag-o nga kaso sang Coronavirus Disease 2019 (COVID-19) sa Western Visayas.
As of May 8, nagapabilin sa 92 ang COVID-19 cases, 10 ang patay samtang nagsaka sa 36 ang naka recover matapos nga may duha ka pasyente nga nagdugang.
Suno kay Dr. May Ann Sta Lucia, pinuno sang Health Promotion Cluster kag COVID-19 spokesperson sang Department of Health 6, ang duha ka mga naka recover amo ang Patient no. 21 nga amo ang 44 anyos nga lalaki sang Altavas, Aklan kag Patient no. 62 nga amo ang 65 anyos nga babayi sang Bacolod City.
Ginpahayag ni Sta. Lucia nga sa 341 ka laboratory results nga ginpaguwa sang Western Visayas Medical Center, lunsay negatibo ang resulta kun sa diin 10 diri ang ginpaidalom sa repeat testing.
Sa pangkabug-usan, anum ang COVID-19 cases sa Aklan, 14 sa Antique, lima sa Capiz, 18 sa Iloilo, 2 sa Negros Occidental, siyam sa Bacolod City, 15 sa Iloilo City kag 23 ang nagpositibo sa repatriates.
