ILOILO CITY – Nag-abot na sa Iloilo ang COVID-19 fully automated nucleic acid extraction machine nga makabasa sang halos isa ka libo nga Polymerase Chain Reaction swab samples sa sulod sang isa ka adlaw nga nagabalor P2.5 milyon.
Sa interview sang Bombo Radyo kay Iloilo Governor Arthur Defensor Jr., iya ginpahayag nga tuman ka dako ang mangin bulig sang nasambit nga makina.
Suno kay Defensor, paagi sa nasambit nga makina mas mapasangkad ang testing capacity sang Western Visayas Medical Center.
Dugang sang natungdan, nagasugod naman ang procurement process sang Provincial Government sa nasambit nga makina nga ipahamtang sang Iloilo Provincial Hospital.
Nahibaluan nga ginaplano sang Iloilo Provincial Government nga i-develop bilang laboratory testing facility ang Iloilo Provincial hospital nga mahimo patigayunan sang test para sa Coronavirus Disease 2019 kag iban pa nga balatian.
