ILOILO CITY – Nagdangat na sa 33 ang numero sang COVID-19 positive nga personnel sang Izeem Commercial sa Zone 3, Barangay Magdalo, La Paz, Iloilo City.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga nag-ugat ang paglatnanay sang COVID-19 sang nagpositibo sa amo nga virus ang tag-iya sang nasambit nga warehouse.
Suno kay Conlu, gilayon nila nga ginpaidalom sa Reverse Transcription Polymerase Chain Reaction (RT-PCR) test ang tanan nga empleyado sang Izeem commercial nga amo ang kalabanan nagastay-in sa ulubrahan.
Nagpahanumdom naman ang natungdan sa tanan nga establisyemento komersyal sa syudad sang Iloilo nga mas hugtan pa ang pagpatuman sang minimum health protocol ilabi na kun madamo ang empleyado.
