Padayon nga ginapangita sang COVID-19 Team sang Iloilo City Government ang isa ka Vietnamese national nga ginapahayag nagpalagyo matapos nagpositibo sa COVID-19.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad, iya ginpahayag nga naga-istar sa isa ka apartment ang amo nga Vietnamese national sa Arevalo, Iloilo City.
Nagpaidalom sa saliva COVID-19 test ang amo nga Vietnamese national sa syudad sang Passi.
Suno kay Conlu, may kaupdanan nga sibiliyan ang Vietnamese national sa diin nagaproseso ang mga ini sang dokumento agud magpadulong sa Palawan.
Apang kumpirmado nga wala man sang rekord ang Vietnamese national kalakip na ang iya kaupdanan nga nakapadulong ang mga ini sa Palawan wala sang kompleto nga mga dokumento.
Sang nagwa ang resulta sang COVID-19 test sang Vietnamese, gilayon ini nga ginforward sang Passi City sa City Epidemiology and Disease Surveillance Unit (CESU) sa syudad sang Iloilo.
Gintawagan pa sang COVID-19 Team sang syudad ang Vietnamese sa diin sa una nga kahigayunan, nagsabat pa ini.
Apang sa subong, nakapatay na ang cellphone sini kag indi na makontak.
Bangud sini, kaupod ang mga pulis, padayon pa nga ginpangita ang Vietnamese national kalakip na ang iya mga kaupdan.
Gin-ako ni Conlu nga may impormasyon na sila nga nabaton apang indi pa nila ini mahambal sa publiko.
