Mayor nga isyu sa Estados Unidos amo ang pag-responde sang gobyerno sa COVID-19 pandemic.
Ini ang pahayag ni anay US Ambassador to the Philippines Harry Thomas Jr.
Si Mr. Thomas ang ang nagserbe bilang US Ambassador to the Philippines humalin 2010 tubtob 2013 sa idalom ni anay US President Barrack Obama.
Sa interview sang Bombo Radyo kay Mr. Thomas, iya ginpahayag nga terible ang nangin responde ni US President Donald Trump sa COVID-19 sa diin daw kaangay nga ginabalewala lang niya ini.
Ginapakita man sa polls nga ang sadto anay nagasuporta sa iya ang subong nagdesisyon na nga indi siya pagsuportahan bangud sa madugay nga pagresponde sa pandemya.
Suno sa anay US Ambassador to the Philippines, kinahanglan nga sundon gid sang tawo ang Science nga kabaliskaran naman sa pagpati ni Trump.
Kun si Democaratic candidate Joe Biden ang madaog bilang Presidente, pat-od ni Mr. Thomas nga himuon sini ang tanan niya nga masarangan agud nga ma hagan-hagan ang epekto sang COVID-19 sa Estados Unidos kaangay na lang sa ginhimo ni anay US President Barrack Obama nga pagpakig-away batuk sa Ebola.
Bisan ang Estados Unidos sa subong nga administrasyon ang wala man sang bastante nga testing sa diin dapat kuntano pahayag ni Mr. Thomas nga may yara sang maid-id nga contact tracing nga ginapatigayon.
Kun siya ang papilion, ang pagbukas sang ekonomiya ukon ang pagpatuman sang lockdown, malip-ot lang ang nangin sabat ni Mr. Thomas — “Kabuhi ang pinaka-importante”.
Dugang pa sang anay US Ambassador, ginalantaw niya nga padayunon ni Biden ang na umpisahan ni Obama sadto nga pagsuporta sa Pilipinas kun West Philippine Sea ang pahambalan.
Kun madumduman, ginhatagan sang Estados Unidos sa tyempo ni anay US President Obama ang Pilipinas sang tatlo ka mga barko agud nga mapasangkad pa ang maritime security capabilities sa pihak sang tensyon sa gina-agawan nga teritoryo.
Sa subong masobra 80 million ka mga tawo na ang nakaboto sa Estados Unidos sa diin lakip na si Mr. Thomas sa nag early vote.
