ILOILO CITY – Gindayaw ni Mayor Jerry Treñas ang ginapatigayon nga COVID-19 response sang tagsa ka barangay sa syudad sang Iloilo.
Sa interview sang Bombo Radyo kay Treñas, iya ginpahayag nga dalayawon ang ginahimo sang mga barangay officials agud nga indi na madugangan ang numero sang local transmission.
Ginpahayag ni Treñas nga may pila ka mga barangay nga may yara na sang imporvement kun COVID-19 cases ang pagahambalan apang ang San Juan sa Molo ang may yara sang pinakamataas nga COVID-19 cases.
Samtang, ginpanindugan naman ni Punong Barangay Pascual Espinosa IV nga wala sila naga-untat sa istrikto nga pagpatuman sang minimum health standards.
Suno kay Espinosa, siya mismo ang nagapanguna sa paglibot sa barangay agud nga magpangsaway sang mga pumuluyo nga wala nagasuksok sang face mask kag wala nagasunod sa physical distancing.
Ginpahayag ni Espinosa sa subong, 86 ang na record nga COVID-19 cases sa ila lugar apang indi lang niya matumod kun pila pa ang active cases.
