OKLAHOMA, USA – Mas halog ang ginapatuman nga quarantine restrictions sa Oklahoma sa Estados Unidos may kaangtanan sa COVID-19 pandemic.
Suno kay Bombo International Correspondent Jerson Peñaflor, wala sang travel restrictions kag ang mga residente ang may option sa pagsuksok sang face mask magluwas lang sa pagpadulong sa mga hospital.
Ginpahayag ni Peñaflor nga ang pagpatuman sang quarantine restrictions ang nakadepende sa na record nga COVID-19 cases sa tagsa ka estado kun sa diin kalabanan sa mga kaso ang na record sa nursing homes kag processing plant.
Bilang clinical scientist kag nagatrabaho sa duha ka hospital, ginpahayag ni Peñaflor nga nagasunod gid siya sa minimum health protocol kag kun tuhoy naman sa releasing sang COVID-19 test results, inoras lamang ang hulaton sang pasyente.
Bilang kabahin sang preventive measure sang federal government, ginpasirado ang mga commercial establishment sa sulod sang duha ka bulan apang bangud nga madamo ang nagreklamo, liwat naman ini nga ginbuksan.
Apisar sini, indi man madula suno sa natungdan nga may mga dungol nga wala nagasunod sa minimum health protocol sa pagpati nga indi matuod ang COVID-19.
Bilang frontliner, ginpahayag ni Peñaflor nga iya mismo nasaksihan nga todo suporta ang federal government sa health sector.
