ILOILO CITY – Gin-ako sang Iloilo City Government COVID-19 team nga indi mabantayan sang syudad ang tanan nga tawo nga nagapaidalom sa COVID-19 testing sa Iloilo Freedom Grandstand.
Sa interview sang Bombo Radyo kay Jeck Conlu, COVID-19 Team spokesperson sang syudad, iya ginpahayag nga indi bastante ang salakyan sang city government agud ma-transport ang mga nagapa-swab test halin sa ila balay padulong sa grandstand kag papuli naman liwat sa ila puluy-an.
Suno kay Conlu, nagabulig man ang barangay officials agud nga makapadulong sa grandstand ang mga close contacts sang mga infected nga pasyente.
Sa bahin sang mga nagamato-mato lang kadto sa testing area kag indi mamonitor maayo kun may hapitan pa nga mga lugar ukon establisemento, ginpahayag ni Conlu nga ‘shared responsibility’ na ini kuntani bangud indi man malikop tanan sang gobyerno.
Open space na gani suno sa iya ang Iloilo Freedom Grandstand; 2,000 ang venue capacity kag 600 ang average nga gina-cater nga pasyente kada adlaw gani nga malayo na ini sa capacity limit suno sa iya.
Matandaan nga sang ginpatigayon ang mass testing sa mga city hall employees sang nagligad nga semana, nangin mainit sa mata sang publiko ang sitwasyon sa freedom grandstand bangud sa pagdugok sang mga tawo.
