ILOILO CITY – Nagpasalig ang COVID-19 team sang Iloilo City Government nga magahatag sang bulig sa mga residente sang Jalandoni Estate sa distrito sang Lapuz nga apektado sang surgical lockdown.
Ini matapos nga naka-quarantine ang tanan nga barangay officials kasunod sang pagpositibo sa COVID-19 ni Punong Barangay Efren Gimeo.
Sa interview sang Bombo Radyo kay Public Safety and Transportation Management Office head Jeck Conlu, iya ginpahayag nga nakalab-ot na kay Mayor Jerry Treñas ang sitwasyon sa nasambit nga barangay ilabi na nga wala sang may maga-asikaso sa kinahanglanon sang mga pumuluyo.
Suno kay Conlu, may yara sang mga volunteer nga ipadala ang COVID-19 team nga amo ang magabantay kag magpalab-ot sang nagakaigo nga bulig sa tagsa ka pumuluyo.
Tuhoy naman sa violation ni Punong Barangay Gimeo, ginpahayag ni Conlu nga nakadepende na ini sa alkalde ukon sa Iloilo City Council.
Indi naman makahatag sang tul-id nga detalye si Conlu tuhoy sa ginapahayag quarantine violation sang isa pa gid ka Punong Barangay nga si Elfren Cenayo sang Don Esteban sa distrio man sang Lapuz.
Sa pagpaathag sang natungdan, wala pa siya sang may nabaton nga impormasyon tuhoy sa resulta sang COVID-19 test ni Punong Barangay Cenayo.
