Gin-ako sang COVID-19 Team sang Iloilo City Government nga nangin mahinay ang ila nga pagkuha kag pag-isolate sa mga pasyente nga nagpositibo COVID-19 sa syudad sang Iloilo.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga ini ang bangud man sa pagkakulang sang ila nga mga personnel kaangay sang driver kag mga nurse nga nagpositibo man sa virus.
Suno kay Conlu, nagasaka sa indi magnubo sa 100 ang pasyente nga infected sa virus nga ila gina-akomodar adlaw-adlaw rason nga indi nila madali-dali sa pagkuha ang tanan-tanan.
Magluwas diri, tuman man kadamo ang ila ginapaidalom sa swab testing.
Ginpahayag ni Conlu nga wala man ginapabay-an ang mga positibo sa COVID-19 samtang wala pa nila natransfer sa isolation facility bangud ginapamonitor man sila gilayon sa mga barangay official sang ila lugar kag Barangay Health Emergency Response Teams (BHERTs).
Nagpasalig man si Conlu nga nagahimo na sila sang pila ka mga tikang kag pamaagi agud nga matatapan ang tanan nga COVID-19 positive sa syudad sang Iloilo.
