ILOILO CITY – Duha ka violators ang gin-isyuhan sang citation ticket matapos naglapas sa health protocol kadungan sa ginpatigayon nga bulang kaangot sa fiesta ni Nuestra Señora de la Candelaria sa Iloilo Coliseum sa San Isidro Jaro Iloilo City.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad sang Iloilo, iya ginpahayag nga apat lamang ka tawo ang manugbantay sa kada manok nga ginabulang.
Suno kay Conlu, magluwas sa duha ka tumalan-aw nga ila gin-isyuhan sang citation ticket, wala man sang dako nga bayolasyon sa bulang.
Nasunod man suno sa iya ang phyisical distancing kag limitado ang tanan nga gahod sa sulod sang bulangan.
Ginpahayag ni Conlu nga daw kaangay nga indi bulangan ang nasambit nga aktibidad bangud sa mga ginpatuman nga health protocol.
Samtang, gintuad man ni Conlu nga may nabaton sila nga impormasyon sa diin may yara sang nagagamit sang livestream devices sa sulod sang bulang kaangay sang cellphone, camera kag iban pa.
Ginpaathag niya nga ang ila mayor nga gintutukan amo ang actual nga venue sa diin ila ginpasigurado nga indi malapas ang tanan nga health protocol.
Matandaan nga santo sa Memorandum Circular 2020-140 sang Department of the Interior and Local Government (DILG), nasaad nga responsibilidad sang mga local government unit officials nga i-monitor ang cockfighting operations kag tutukan ang protocol sa no-live streaming and public exhibition.
