ILOILO CITY – Nagalaom ang COVID-19 team sang Iloilo City Government nga maathag na sang Department of Health central office kun ngaa nalakip ang syudad sang Iloilo sa Top 5 nga may pinakamadamo nga COVID-19 cases sa bilog nga Pilipinas.
Sa interview sang Bombo Radyo kay Mr. Jeck Conlu, tagpamaba sang COVID-19 team sang syudad, iya ginpahayag nga adlaw-adlaw gina-validate sang City Health Office ang data nga nagasulod sa diin mismo ang syudad kag ang Department of Health region 6 ang may yara sang kaangay nga numero sang kaso.
Suno kay Conlu, may yara lang sang anom ka COVID-19 cases ang syudad subong nga adlaw kag ini naman ang ginabantayan sang Iloilo City Government sa bahin sang DOH national office kun bala magsanto ukon indi ang ila nga data.
Nahibaluan nga nagpasa sang sulat si Iloilo City Mayor Jerry Treñas sa DOH national office nga nagapangayo sang kaathagan matapos nga nalakip ang syudad sang Iloilo sa high risk areas nga may mataas nga COVID-19 cases.
