Patigayunon na ang launching sang COVID-19 vaccination sa mga kabataan edad 5-11 anyos sa syudad kag probinsya sang Iloilo subong nga adlaw, Pebrero 14.
Ang cultural center sang West Visayas State University (WVSU) ang isa sa napili nga venues sang probinsya nga mangin simultaneous man sa Aleosan District Hospital sa Alimodian, Iloilo kag sa isa ka mall sa banwa sang Pavia.
Ang syudad sang Iloilo ang may yara man sang simultaneous activities sa separado nga venue.
Kaupod sang syudad ang Philippine Pediatric Society.
Sa interview sang Bombo Radyo kay Dr. Joselito Villaruz, presidente sang WVSU, iya ginpahayag nga preparado ang unibersidad bangud may yara sang dugang nga volunteer doctors magluwas pa nga nagamit naman ini bilang vaccination site sa lain nga age group.
Pfizer vaccine lang ang gamiton sa pagbakuna sa mga bata bangud ini lang ang naka-secure sang emergency use approval nagikan sa Philippine Food and Drug Administration (FDA).
Mas matahaw ini ukon may lower dosage kag lower concentration ipaanggid sa mga ginahatag nga dose sa mga naga-edad 12-17 anyos.
Gin-reformulate ini agud nga masarangan sang lawas sang bata sa age group nga 5-11.
Ginpaathag ni Villaruz nga gintun-an sang maayo ang ini nga mga bakuna, wala ukon minimal lang ang na-note nga adverse reactions, kag makabulig man agud nga makabalik na sa face-to-face classes ang mga kabataan.
