ILOILO CITY – Ginkalipay sang Iloilo City Government ang positibo nga pagresponde sang mga barangay officials sa syudad sang Iloilo sa ginpatigayon nga education campaign natuhoy sa COVID-19 Vaccination.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga pinaagi sa asud-asud nga forum, pagsinapol, kag information dissemination sang Local Government Unit sang syudad, nagsaka na ang numero sang mga barangay officials lakip na ang ila pumuluyo nga nag-apruba sa pagpabakuna sa COVID-19 vaccine.
Suno kay Conlu, mas maayo nga mangin ehemplo man ang mga pinuno sang kada barangay sa Iloilo City sa pagpanguna sa COVID-19 Vaccination.
Nahibaluan nga bangud sa nagapadayon nga ‘The BOMBO COVID-19 Literacy’ sang Bombo Radyo Iloilo, pila na ka mga health professionals ang nagsabat sa madamo nga palamangkutanon sang publiko natuhoy sa COVID-19 vaccines.
May gin-imbitar man nga mga guest ang Bombo Radyo humalin sa nanuhay-tuhay nga pungsod nga nauna na nga nakapabakuna kag nagpabutyag man sang ila madinalag-on nga eksperyensya.
