Indi libre ang Coronavirus Disease 2019 (COVID-19) vaccine nga magahalin sa China ukon Russia.
Ini ang pahayag ni Presidente Rodrigo Duterte kagab-i sa iya public briefing.
Suno sa presidente, ang makasalbar sang ginapangatubang nga pandemya sa subong amo ang bakuna.
Ginpasalamatan ni Duterte ang Russia kag China bangud sa pagpabutyag sang kagustohan nga mag supply sang bakuna sa Pilipinas sa tion nga ini na ang mangin available.
Pahayag pa sang Presidente, kun mahal ang balor sang bakuna, hingyuon niya ang iya mga abyan nga sanday Russian President Vladimir Putin kag Chinese President Xi Jinping nga hatagan siya sang credit — kaangay sang utang apang indi sa isa lang ka bayad kundi pinaagi sa installments.
Sa subong gina-preparahan na sang Pilipinas kag Russia ang pag-umpisa sang phase 3 clinical trials sang Sputnik V sa bulan sang Oktubre kag nagalaom ang Malacañang nga mangin solusyon ini sa pandemya nga ginapangatubang sang bilog nga kalibutan.
