Posible nga mangin available na sa publiko sa Nobyembre subong nga tuig ang COVID-19 vaccine nga ginadevelop sang China.
Suno kay Wu Guizhen, chief biosafety expert sa Chinese Center for Disease Control, nagalaum ang mga firms sa China nga maaprubahan na ang mga bakuna pagkatapos sang phase 3 trial sa katapusan nga mga binulan sang tuig 2020.
Nahibaluan nga ginadisplay na subong sang mga Chinese companies nga Sinovac Biotech kag Sinopharm ang ila vaccine candidates sa trade fair sa Beijing.
Wala man partikular nga gintumod ni Wu kun ano nga vaccine apang suno sa iya, tama ka ‘smooth’ ang pag-uswag sang pagdevelop sang bakuna base sa phase 3 clinical results.
Ginpahayag man ni Wu nga siya mismo ang nag-take sang bakuna sang Abril kag wala gid siya sang malain nga ginabatyag sa lawas sang nagligad nga mga binulan.
Sa bilog nga kalibutan, may siyam ka vaccine candidates nga yara subong sa late-stage human trials.
