Ginalauman nga maabot subong nga adlaw ang masobra 6,000 doses sang AstraZeneca COVID-19 vaccines sa probinsya sang Iloilo.
Sa interview sang Bombo Radyo kay Governor Arthur Defensor Jr., iya ginpahayag nga ang maabot kuntani nga mga bakuna ang para lang sa pribado nga sektor bangud una sila nga nag-order sang COVID-19 vaccines.
Apang nagpasugot ang pribado nga sektor suno kay Defensor nga tungaon na lang anay ang mga bakuna sa local government unit agud nga mahatagan man ang iban nga mga pumuluyo sang probinsya.
Samtang indi naman solusyon sa nagataas nga kaso sang COVID-19 pahayag sang gobernador ang pagpaidalom sang probinsya sa Enhanced Community Quarantine (ECQ).
Mas maayo pahayag sang gobernador nga panumdumon ang iban pa nga pamaagi magluwas sa pagpahugot sang quarantine status.
