ILOILO CITY- Positibo ang Iloilo Provincial Government nga mapangtublok ang supply sang COVID-19 vaccines antes pa man mag-expire ang mga ini.
Sa interview sang Bombo Radyo kay Dr. Maria Socorro Quiñon, head sang Provincial Health Office(PHO), iya ginpahayag nga subong nga Abril 30, may yara sang 800 vials sa vaccine room nga natalana nga mag-expire.
Apang suno sa iya, gamay lang ini nga bakuna kag mahingagaw ini nga matublok sa mga pumuluyo.
Pahayag ni Quiñon,sa bahin sang mga Local Government Units kag PHO, may yara sang kabilugan nga 12,000 vials nga natalana nga mag-expire sa Hunyo kag Hulyo.
Bangud sini, gina-engganyo ni Quiñon ang mga pumuluyo nga boluntaryo nga magpabakuna ukon magpatublok sang booster shot bilang dugang nga proteksyon kag agud indi mauyangan ang mga bakuna.
Sa bahin naman sang Department of Health Western Visayas Center for Health Development, ginpahayag ni Dr. Bea Camille Natalaray,spokesperson sang ahensya, nga wala sang expired nga bakuna sa ila cold room.
Suno sa iya, hugot man ang kampanya sang DOH sa kabanwahanan nga mas pasangkaron pa ang vaccination program.
Una na nga ginmando ni Presidente Rodrigo Duterte ang house-to-house anti-COVID-19 vaccination program bangud yara sa 25 tubtob 27 ka million sang mga bakuna ang ma-expire sa Hulyo.
