ILOILO CITY – Wala nakaapekto ang Coronavirus Disease 2019 (COVID-19) pandemic sa pagtuo sang mga Kristiyano.
Ini ang pahayag ni Jaro Archbishop Most Rev. Jose Remeo Lazo, D.D., may kaangtanan sa pandemya nga ginapangatubang sang bug-os nga kalibutan kun sa diin kanselado ang church activities.
Sa Good Morning Philippines program, ginpahayag ni Archbishop Lazo nga indi mahinago nga may yara sang negatibo nga epekto ang COVID-19 sa adlaw-adlaw nga pagpangabuhi apang ang nasambit nga pandemya ang may yara man sang natuga nga maayo.
Isa diri suno kay Archbishop Lazo amo ang bayanihan system may kaangtanan sa pagpalab-ot sang bulig sa mga nagakinahanglan.
Apisar sang ginapatuman nga lockdown suno kay Archbishop Lazo, ang pagtuo sang mga Kristiyano ang wala na quarantine bangud apisar nga ginadumili-an ang pagtambong sang mga deboto, nangin palaagyan naman ang media agud nga mapalayag ang ginapatigayon nga misa.
May kaangtanan sa amat-amat nga pagdula sang restrictions, ginpahayag sang Arsobispo nga maga amat-amat man ang pagbalik sang religious activities apang kinahanglan sa gihapon nga sundon ang health protocol.
Agud nga mahagan-hagan ang epekto sang COVID-19, nagakadapat suno sa natungdan nga batunon sang hugot ang pagpangabuhi sa ginatawag nga new normal.
